Në mbledhjen që po zhvillohet në selinë e PD me drejtuesit e degëve të kësaj partie apo siç njihet “Kolegji i Kryetarëve” ka pasur një mbështetje ndaj Lulzim Bashës.
Të pranishmit kanë ngulmuar se zgjidhje nuk ishte dorëheqja e Bashës, por krijimi i një procesi bashkimi ku ky i fundit të ishte drejtues.
Akuzat e kryetarëve të degëve ndaj Berishës kanë qenë të përsëritura duke theksuar se humbja në zgjedhjeve kishte ardhur si shkak i garës së këtij të fundit kundër PD. Duke shtuar më tej se heqja e vendimit të marrë në 9 shtator nuk ishte zgjidhje. I vetmi deri më tani, i cili mbajti një qëndrim më ndryshe karshi Bashës, ishte deputeti Lefter Gështenja i cili kërkoi që Basha dhe Berisha të bënin hapa mbrapa dhe të kishte një lloj armëpushimi.
“Rrugët e bashkimit: një hap pas të dy Basha dhe Berisha, qetësohet situata dhe të ketë një armëpushim. Dhe pastaj një platformë për të çuar në zgjidhje. Ne duhet të gjejmë një zgjidhje. Kemi një problem dhe duhet të gjejmë zgjidhje. Të gjithë bashkë të ringrejmë PD dhe të ecim para. Duhet të bashkohemi”, tha Gështenja, i cili drejton edhe degën nr 7 në Tiranë.
Nën presionin e deputetëve që i kërkojnë dorëheqjen, Basha ka thirrur Kolegjin e Kryetarëve, një strukturë që e kontrollon plotësisht për shkak se rreth 80 % e atyre që mbajnë postet si drejtues janë emëruar pikërisht prej tij. Në mbledhjen e shkuar të Kolegjit, ata që u anatemuan ishin deputetët, të cilët edhe në mbledhjen e sotme u vunë nën akuza, madje duke hedhur idenë se ata duhet të dorëzojnë mandatet.
