Bayern Munich është bërë skuadra e parë që kualfikohet për në fazën çerekfinale të Ligës së Kampioneve.
Bavarezët treguan sot se janë shumë të fortë për një rival austriak si Salzburg duke i shkatërruar me rezultatin e thellë 7-1.
Në “Allianz Arena” ishte Robert Lewandowski që udhëhoqi skuadrën e Nagelsmann me një tripletë të frikshme në 23’ minuta lojë çka konfirmon edhe njëherë se mbetet një nga bomberët më efikas në Champions dhe jo vetëm.
Dy të parët e shënuar në 12’ dhe 22’ u realizuan me penallti nga bomber polak ndërsa i treti një minutë pas penalltisë së dytë duke u bërë kështu autori i tripletës më të shpejtë në Champions në fazën me eliminim direkt.
Pas 3 golave të shpejtë, nuk ka më histori ndeshja që gjithsesi flet për Bayernin që shënon edhe 4 herë të tjera me Gnabry 31’, Thomas Muller dy herë në 54’ e 83’ dhe Sane në 85’. Golin e flamurit për miqtë e shënoi Kjaergaard në 70’ me duelin që mbyllet 7-1 për Bayern Munchen.
Me këtë sukses Lewandowski me shokë kalojnë në çerekfinale dhe sigurisht që mbetet favorite numër 1 për të fituar trofeun e Championsit.
