Komisioni i Rithemelimit të Partisë Demokratike reagon për herë të parë lidhur me zgjedhjet e pjesshme.
Sipas Komisionit të Rithemelimit të Partisë Demokratike, zgjedhjet treguan se demokratët nuk duan t’i shkojnë pas Lulzim Bashës, të cilit i referohet si “një klloun”.
Në një deklaratë zyrtare të komisionit, falënderohen “me mirënjohje të thellë, të gjithë demokratët dhe anëtarët e koalicionit ‘Shtëpia e Lirisë’ për mbështetjen e tyre të madhe në zgjedhjet e 6 Marsit”.
“Një falenderim për Shkodrën dhe qytetarët e saj të cilët me mbështetjen e tyre për kandidatin e ‘Shtëpisë së Lirisë’ Bardh Spahia, dëshmuan se Shkodra si gjithnjë mbetet Rozafa e lirisë së shqiptarëve. Në këto zgjedhje ne u përballëm jo vetëm me kreun e Meduzës, por edhe me shtojcat e tij, që duan ta mbajnë Partinë Demokratike opozitë fasadë, peng të regjimit”, thuhet më tej në reagim.
“Gjithsesi, vijon deklarata, vota e popullit opozitar tregoi qartë se demokratët dhe opozita e vërtetë nuk mund të nënshtrohen dhe nuk mund të merren peng. Ajo është gati për t’u ringritur plot besim dhe shpresë”.
Sipas komisionit, “vota e qartë e 6 Marsit tregoi se demokratët nuk duan t’i shkojnë pas në greminë, një kllouni që pas 6 humbjesh deklaron se nuk ka humbur kurrë dhe që provon se nuk do të arrijë të kalojë dot as pragun elektoral”.
Reagimi mbyllet me një thirrje: Komisioni i Rithemelimit të Partisë Demokratike, opozita e vetme dhe e vërtetë: I bën thirrje të gjithë anëtarëve, mbështetësve, drejtuesve, deputetëve që janë në Partinë Demokratike për shkak të idealeve dhe jo të interesave, t’i bashkohen vullnetit të popullit opozitar për një Parti Demokratike të Rithemeluar më të hapur, më të fortë dhe më të bashkuar!
