Lealba Pelinku, nënkomisionere e KQZ, në një deklaratë për mediat, ka komentuar ecurinë e votimit në 6 bashki ku mbahen zgjedhjet për kryebashkiak.
Ajo tha se në 3 qendra votimi në Shkodër ka qenë e pamundur të përdorej pajisja e identifikimit për shkak se operatori nuk ka mundur të paraqitej në qendër. E njëjta problematikë është përseritur edhe në Durrës.
“Bëhet fjalë për 3 qëndra votimi në Shkodër ku ka qenë e pamundur të përdorej pajisja e identifikimit duke qenë se operatori nuk ka mundur të paraqitej në qendër. Gjithashtu edhe një rast i tillë është përsëritur në Durrës. Nuk është arritur të bëhet zëvendësimi i operatorit”, tha ajo.
Pelinku u shpreh se janë zëvendësuar 15 pajisje.
“Në momentin që është bërë në përputhje me kodin zgjedhor nuk paraqet ndonjë problematikë nga aspekti ligjor. Janë marrë masat që video-monitorimi të jetë i rregullt.
Votimi elektronik raportohet se ka ecur në mënyrë të shkëlqyer dhe nuk kemi asnjë pikë dyshimi se edhe procesi i numërimit elektronik që do kryhet në qendrat e votimit, do të konfirmojë suksesin e kësaj teknologjie në bashkinë e Vorës”, tha ajo.
