Mbi 648 mijë qytetarë mund ushtrojnë të drejtën e votës në zgjedhjet që do të mbahen nesër (6 mars) në 6 Bashkitë e vendit, për të zgjedhur kryebashkiakët.
Zgjedhjet zhvillohen në Bashkitë Shkodër, Durrës, Dibër, Lushnje, Vorë dhe Rrogozhinë, ndërsa në garë përfshihen kandidatët e “Shtëpisë së Lirisë”, një koalicion i regjistruar në emër të LSI dhe PDK, por që u gjet si rrugë ligjore për përfaqësimin në zgjedhje të Komisionit të Rithemelimit të PD, kandidatët e PS-së dhe ato të PD të drejtuar nga Lulzim Basha.
Bashkia Dibër është e vetmja bashki ku qytetarët do të kenë mundësi të zgjedhin mes 4 kandidatëve, ku krahas PS, PD dhe koalicionit Shtëpia e Lirisë do të ketë edhe një kandidat të partisë “Lëvizja e Re”.
Shkodra dhe Durrësi pritet të marrin vëmendjen më të madhe në zgjedhjet e nesërme, ndërsa sondazhet e publikuara deri më tani favorizojnë kandidatin e “Shtëpia të Lirisë” Bardh Spahia në kryeqendrën e veriut, ndërsa në Durrës më e favorizuar është Emirjana Sako e PS, bazuar në sondazhet e publikuara.
Numrin më të lartë të zgjedhësve të regjistruar e ka Bashkia e Durrësit me një total prej 258633 qytetarë me të drejtë vote, e ndjekur nga Shkodra me 166983 qytetarë, Lushnja me 104249 qytetarë, Dibra me 56662, Rrogozhinë me 31996 dhe Vorë 30053 qytetarë me të drejtë vote.
Interesante mbetet fakti se sa nga zgjedhësit e regjistruar në listat e votimit do të marrin pjesë në proces, ndërsa drejtuesit e fushatës i kanë drejtuar apeleve qytetarëve që të dalin masivisht në votime.
