Ish-deputeti Lefter Maliqi u shpreh në një intervistë në Oranews se Lulzim Basha i ka shitur zgjedhjet vendore të 2019, ndërsa sot po bën lojën për të mbajtur peng Partinë Demokratike, duke kandiduar në 6 bashkitë ku do ketë zgjedhje të pjesshme në 6 mars.
Maliqi tha se marsi do të sjellë zhvillime dhe pas 6 marsit, Lulzim Basha, nuk do të ketë më mundësi të mbajë peng PD, pasi do të marrë një nga rezultatet më turpshme.
“Nuk e diskutoj fare që kandidatët e Lulzim Bashës do të dalin të 3-ët në të 6 bashkitë”, tha Maliqi.
Ai tha se këto zgjedhje do të tregojnë “opozitën e vërtetë”. “Besoj se koalicioni “Shtëpia e Lirisë” do të fitojë 3 bashki, por ajo që dua të them është që kur të bëhen analizat, ju do të shikoni që populli opozitar do të ketë shumë më shumë vota se Rilindja”, tha Maliqi. Sipas tij, pas 6 marsit do të lindë opozita e vërtetë, pasi Lulzim Basha është peng i Edi Ramës.
Ai tha se Basha është një humbës serial, ka vetëm një qëllim që të mbajë atë karrigen e PD, për të bërë pazare, dhe asgjë më shumë.
“Basha ka pazare me Edi Ramën që në 2017 dhe vijojnë pazaret. Ai do të dalë i treti në 6 mars dhe do dalë do të thotë që do të bëjmë betejën”, tha Maliqi, duke shtuar se “ai është frikacak, i dobët, servil, dhe ndaj nuk ikën si kryetar i PD”.
