Gazetari Blendi Fevziu ka shkuar në kufirin e Ukrainës me Poloninë dhe ndodhet në pikën e parë që pret refugjatët që i largohen luftës.
Ai ka shpërndarë një video në rrjetet sociale ku tregoi se pjesa më e madhe e refugjatëve vijnë në këmbë, ndërsa pjesa tjetër me çfarëdo lloji mjeti tjetër.
“Kjo është pika e parë e pritjes së refugjatëve që vijnë nga Ukraina në drejtim të Polonisë dhe më pas të Europës perëndimore. Praktikisht, kufiri është diku 7 kilometra larg, pjesa më e madhe e tyre vijnë në këmbë, ndërsa të tjerët me çdo lloj mjeti që iu gjendet. Pra, nga kjo zonë që është qendra e parë më e madhe e banuar e Polonisë, ata shpërndahen me trena në drejtim të Varshavës dhe pikave të tjera të Europës perëndimore. Ndërkohë që brenda markatës është krijuar një kamp për disa qindra njerëz, të cilët qëndrojnë aty gjithë natën deri në momentin e pritjes. Janë duke pritur një tjetër autobus që po sjell nga kufiri pjesën e refugjatëve, e cila ka arritur gjysmë milioni në Poloni”,-thotë Fevziu.
