Vetëm katër shtete, përveç vetë Rusisë, votuan kundër rezolutës në OKB që dënon agresionin rus në Ukrainë.
Asambleja e Përgjithshme e OKB-së ka votuar në favor të një rezolute që dënon agresionin rus dhe i bën thirrje asaj që menjëherë të tërheqë të gjitha forcat e saj ushtarake nga Ukraina.
Rezoluta u mbështet nga 141 shtete, nga 193 anëtarë, në një sesion të rrallë urgjent të Asamblesë së Përgjithshme të thirrur nga Këshilli i Sigurimit i OKB-së.
Vendet që votuan kundër rezolutës në OKB janë, vetë Rusia, Koreja e Veriut, Eritrea, Siria dhe Bjellorusia. Gjithashtu 34 vende abstenuan.
Surprizë ka qenë vota e Serbisë pro kësaj rezolute, duke dënuar agresionin rus. Më herët Serbia kishte mbajtur një qëndrim ambig, duke refuzuar të dënojë aktet e Putin dhe të vendosë sanksione ndaj Rusisë.
Ky votim, e izolon edhe më tej Putinin dhe është një shenjë se jo vetëm Perëndimi, por shumica e vendeve të botës janë të bashkuara për të dënuar aktet e tij.
Përpara votimit, ambasadori i Ukrainës në OKB Sergiy Kyslytsya tha se Rusia “kishte ardhur për të privuar Ukrainën nga e drejta për të ekzistuar”.
Ambasadori rus Vassily Nebenzia tha se Rusia dëshironte të ndalonte një konflikt separatist në Ukrainën lindore dhe akuzoi Perëndimin për përdorimin e “kërcënimeve të hapura dhe cinike” për t’i bërë vendet të votojnë për rezolutën.
Kjo ishte mbledhja e parë urgjente e Asamblesë që prej vitit 1997.
Rezultati i votimit:
