Kryeministri Edi Rama, gjatë një takimi me të rinjtë në Lushnje, ka komentuar luftën në Ukrainë, pas agresionit rus.
“Në një vend që nuk është fqinj me ne por është i ngjashëm me ne sa i përket sfidave problemeve ekonomike sa i përket vitalitetit të njerëzve për të bërë më shumë sot gjendet përballë një situate të paimagjinueshme për të humbur gjithçka edhe jetën.
Është një vend që i përket të njëjtës familje të vendeve që kanë bërë zgjedhjen e tyre për të besuar te zgjedhjet pluralizmi liria dhe pavarësia e tyre ne të mund të ndalojmë për një moment dhe të kuptojmë se sa pak e vlerësojmë atë që kemi dhe sa shumë e nënvlerësojmë atë që ata njerëz atje sot e shikojnë që tu ikë nga duart dhe tu kthehet në një ëndërr që duket sikur largohet çdo minutë që kalon.
Ata njerëzit atje do ta kishin ëndërr të ishin këtu ulur duke dëgjuar atë përfaqësues të tyre të cilësdo parti që ata vetë kanë zgjedhur e pastaj të dilnin nga këtu e të shkonin në kafe të pa shqetësuar nga zhurma e raketave. Pa pasur tmerrin se shtëpia e tyre mund të bombardohet. Jemi shumë herë më të mbrojtur se ukrainasit. Ne duhet t’i japim më shumë rëndësi qytetarisë përgjegjësisë qytetare në jetën tonë të përditshme dhe detyrimit tonë për të qenë më shumë se vetëm njerëz të mirë për komunitetin tonë”, tha Rama.
