Shumë emocione në “San Siro” por pa gola mes dy rivalëve Milan-Inter. Në një stadium të mbushur që nisi me mesazhe paqeje dhe solidarizuese për konfliktin në Ukrainë, dy ekipet e Milanos u përballën për gjysmëfinalen e parë mes tyre në Kupën e Italisë.
Interi që nuk fiton prej javësh kërkonte reagimin ndërsa Milani konfirmimin por në fakt asnjëra prej këtyre nuk ndodhi pasi dueli u mbyll me rrjeta të paprekura.
Milani ishte shumë më mirë në pjesën e parë, më e rrezikshme dhe më kërkuese që gjithsesi rastet konkrete munguan nga të dyja ekipet. Zikaltërit luajtën disi me frikë ndërsa në fraksionin e dytë u përmirësuan ndjeshëm por edhe këta të fundit nuk e gjetën dot kuadratin e portës. Ndoshta një barazim i merituar duhet thënë ku për finalistin e Kupës së Italisë duhet të presim 31 Marsin kur luhet dhe ndeshja e kthimit.
