Nga Boldnews.al
Këshilli i Lartë i Prokurorisë do të mblidhet të Mërkurën e 2 Marsit në një takim Urgjent për të zëvendësuar anëtarin me mandat të mbaruar, njëkohësisht edhe drejtuesin e saj, Gent Ibrahimi, ndërkohë që “në lojë” është posti i drejtuesit të ri të “qeverisë së prokurorëve”.
Burime konfidenciale nga Parlamenti deklarojnë për “Boldnews.al” se tashmë janë aktivizuar disa mekanizma politikë dhe aleanca fluide, për të orientuar votimin e anëtares së sapozgjedhur, Mirela Bogdani, në krye të Këshillit të Lartë të Prokurorisë për një mandat të plotë.
Juristja Bogdani u zgjodh pak ditë më parë nga Parlamenti, vetëm me votat e maxhorancës socialiste, pas dy tentativave të dështuara për të emëruar anëtarët e rinj të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP) me konsensus politik të të gjithë palëve.
Mirela Bogdani u votua për në Këshillin e Lartë të Prokurorisë si një zgjedhje e Shkollës së Magjistraturës.
Por, procesi i përzgjedhjes së saj ka kaluar nën dyshimet e paligjshmërisë.
Në Vendimin e Mbledhjes së Posaçme të Drejtuesve të Arsimit të Lartë dhe Shkollës së Magjistraturës, që mban datën 15 nëntor 2021, emri i Mirela Bogdanit rezulton se është kandidaturë e Shkollës e magjistratëve të rinj.
Sipas dokumentit, ajo rezulton të ketë marrë 5 vota, duke e qenë e treta në një listë prej 8 kandidatësh. Po ashtu, zonja Bogdani rezulton se është e vetmja kandidate e miratuar nga Shkolla e Magjistraturës për të dy institucionet, KLGJ dhe KLP.
Por, Mirela Bogdani nuk rezulton të jetë pedagoge e Shkollës së Magjistraturës. Në një “biografi personale” zyrtare, zonja Bogdani rezulton se është pedagoge në Fakultetin e Drejtësisë.
Po ashtu, nga një kërkim në faqen zyrtare të internetit të Shkollës së Magjistraturës, zonja Bogdani nuk rezulton të jetë pedagoge pranë këtij institucioni arsimor.
Kjo situatë e vë në dyshim mënyrën e përzgjedhjes së saj, si nga Mbledhja e Përbashkët e Institucioneve të Arsimit të Lartë, po ashtu edhe nga Sekretari i Përgjithshëm i Parlamentit.
Ligji për “Organet e Qeverisjes së Sistemit të Drejtësisë”, në nenin 134 të saj, parashikon ndër të tjera se: “Shkolla e Magjistraturës përzgjedh jo më shumë se një kandidat nga radhët e pedagogëve me kohë të plotë, jomagjistrat në detyrë, dhe pedagogëve me kohë të pjesshme, me kushtin që të mos jenë magjistratë në detyrë, avokatë ose të punësuar me kohë të plotë në organizatat e shoqërisë civile”.
Pra, ligjërisht është e qartë se kandidaturat e përzgjedhura nga Shkolla e Magjistraturës për në Këshillin e Lartë Gjyqësor dhe Këshillin e Lartë të Prokurorisë duhet të jenë më së paku pedagogë të kësaj Shkolle e më tej të plotësojnë një seri kriteresh të tjera, që përfshijnë vjetërsinë në punë, gradat, integritetin personal, e të tjerë.
Po ashtu, një seri nenesh të tjera të të njëjtit ligj theksojnë faktin që kandidatët e Shkollës së Magjistraturës për në KLGJ e KLP duhet të jenë pedagogë të saj.
Ndaj, emërimi i Mirela Bogdanit si anëtare e Këshillit të Lartë të Prokurorisë duket se ka kaluar me sukses filtrat Shkollës së Magjistraturës, të drejtuar nga Arben Rakipi; të Fakultetit të Drejtësisë, të drejtuar nga Artan Hoxha, si edhe nga Sekretari i Përgjithshë të Parlamentit, Genc Gjonçaj, megjithëse kriteret e ligjit nuk ishin në favorin e saj.
Pasi kaloi pengesën e kritereve me “bekimin” e tre zyrtarëve të mësipërm, juristja Bogdani tashmë po pilotohet për drejtuese të Këshillit të Lartë të Prokurorisë.
