Këshilli i Sigurimit i Kombeve të Bashkuara ka votuar për mbajtjen e një sesioni të posaçëm urgjent të Asamblesë së Përgjithshme për të diskutuar pushtimin rus të Ukrainës.
Takimi, i planifikuar për sot do t’u japë fjalën të 193 anëtarëve për të dhënë pikëpamjet e tyre mbi sulmin.
Lulzim Basha e sheh mbajtjen e sesionit emergjent të OKB-së pas Rezolutës së Këshillit të Sigurimit nga Shqipëria dhe SHBA një mundësi për të demonstruar një qëndrim të unifikuar të OKB-së në mbështetje të paqes, pas unitetit të demonstruar nga shumë kombe në NATO dhe BE.
Basha thotë se lufta nuk është kurrë një opsion pasi sjell vdekje dhe shkatërrim.
“Gjithmonë ka vend për dialog, nuk është kurrë vonë. Kjo është koha për këdo që e ka marrë paqen si të mirëqenë, të bashkohet në unitet dhe të punojë me vendosmëri për paqen dhe sigurinë”, shprehet Basha në një reagim.
Ndërkohë autoritetet ukrainase kanë njoftuar se delegacioni i tyre ka mbërritur në kufirin Ukrainë-Bjellorusi për të nisur bisedimet e paqes me delegacionin rus.
Çështja kryesore në axhendën e tyre, thonë ata, është armëpushimi dhe tërheqja e trupave nga territori ukrainas.
