Ish-Kryeministri Sali Berisha nuk ka kursyer batutat në drejtim të Lulzim Bashës, gjatë një takimi që zhvilloi me demokratët në Dajç, bashkia Shkodër, ku kërkoi votat për kandidatin e “Shtëpisë së Lirisë”, Bardh Spahia.
Berisha e quajti Bashën një arrë me vrimë, e cila as nuk hahet as nuk mbin.
“Është peng i dosjeve të tij, dhe siç thotë populli ai është ai arra me vrimë, që as nuk hahet dhe as nuk mbin. Ndaj asnjë votë për kandidatin e Lulzim Bashës, asnjë votë për arrën me vrimë. Ne jemi opozita e vërtetë, çdo votë për Bardh Spahinë në zgjedhjet e 6 marsit. Ne duhet të mbjellim shpresën te shqiptarët”, tha Berisha.
Duke iu rikthyer ngjarjeve të 1997, Berisha tha se në atë kohë PD ishte copë copë, por unë u mbaja fjalim 30 vetëve që vinin te selia e PD sikur të ishin 30 mijë, dhe kur u bëmë 300 vetë ne dolëm dhe pushtuam bulevardin.
“Pse ua thashë këtë? Sepse nuk ka rëndësi sa vetë jemi, nëse ne jemi të vërtetë. Në atë kohë ambasador i OSBE ishte një holandez i grupeve marksiste leniniste, por në raportet që shkruante thoshte se opozita është jeta politike e vendit. Pse e bënim ne atë në 1997? Sepse ne ishim të vërtetët”, tha Berisha.
