Kryeministri Edi Rama, gjatë një takimi të mbajtur në Dibër rreth Këshillimit Kombëtar, tha se legalizimi i kanabisit mjekësor, si lëndë bazë për farmaceutikën po tregon se ka të ardhura të rëndësishme në ekonomi.
“Ne e kemi pasur këtë temë të shtruar në tryezën e opinionit publik që në krye të herës dhe kemi menduar dhe unë e kam thënë se nuk është koha. Mirëpo, sot mbase ka ardhur koha ta shqyrtojmë seriozisht, sepse edhe vende të tjera po e bëjnë. Legalizimi i kanabisit mjekësor, jo për përdorim nga të gjithë, por si lëndë bazë për farmaceutikën, po tregon se ka të ardhura të rëndësishme në ekonomi, krijon punësim, zë të ri në eksport dhe patjetër më shumë të ardhura”, u shpreh Rama.
Rama tha se duhet menduar mirë para se të shkohet te vendimi, ndaj edhe është ndarë me qytetarët.
Kryeministri u shpreh se partnerët janë skeptik. “Jo se e kanë gabim arsyetimin, siç nuk është gabim arsyetimi i kundërt por ata nuk janë të lidhur as me buxhetin e shtetit tonë as me punësimin, pensionin që do të marrin njerëzit. Për ta është më kollaj të thonë më mirë mos e bëni fare”, deklaroi Rama.
