Në Komisionin Parlamentar për Stabilizim Asociimin, përfaqësuesi i Delegacionit të Parlamentit Europian, Eurodeputeti irlandez Ciaran Cuffe theksoi qëndrimin e BE-së për inceneratorët.
“Incenerimi duhet të mbetet zgjidhja e fundit në menaxhimin e qëndrueshëm të mbetjeve në vendet e Bashkimit Europian dhe sipas acquis të BE, sepse tranzicioni për ekonomi të gjelbër prioritizon një qasje ndaj riciklimit dhe ripërdorimit”, tha ai.
Ai u shpreh se “Shqipëria do të duhet të bëjë më shumë për çështjet e ndotjes mjedisore për shkak të shqetësime rreth cilësisë së ajrit dhe emetimit të CO2 në ajër e cila është në shifra të mëdha.
Ai theksoi se duhet të bëhet më shumë në diversifikimin e transportit, ku në veçanti ai publik urban, aksesi për këmbësor dhe transporti multi-modal kryesisht hekurudhor.
Ndërkaq deputetja demokrate Tabaku ndër të tjera tha se: Ndërtimi i një inceneratori të ri, përveç dy atyre ekzistues në Elbasan dhe Fier, paraqet shqetësime në rritje për sa i përket përputhshmërisë me acquis të BE-së për mbetjet, duke përfshirë parimin e hierarkisë së mbetjeve dhe objektivave të riciklimit. Ajo theksoi se incenerimi është aferë korruptive bazuar në procedura pa garë dhe pa konkurrencë.
“Në këtë kontekst, politika e qeverisë bazuar tek inceneratorët, nisur nga përvoja e deritanishme ka patur mungesë të transparencës dhe llogaridhënies. Kjo ka çuar në shndërrimin e një afere të vërtetë korruptive, e cila kërkon zbardhje nga ana e drejtësisë para opinionit publik por dhe vetë partnerëve tanë europianë. Incenerarorët nuk kanë zgjidhur në mënyrë të qëndrueshme problemin e menaxhimit të mbetjeve. Qartësisht kjo politikë nuk ka adresuar dhe prioritizuar rekomandimet e vazhdueshme nga Komisioni Europian mbi nevojën e një strategjie të qëndrueshme që garanton ndarjen e mbetjeve në burim, reduktimin e varësisë së landfilleve, riciklimin dhe ripërdorimin ku mundet. Shqipëria duhet të promovojë ekonominë qarkulluese dhe duhet të stimulojë parandalimin, reduktimin dhe riciklimin e mbetjeve për të reduktuar depozitimin e mbetjeve. Duhet të përshpejtojë zbatimi i legjislacionit për mbetjet e papërpunueshme”, tha Tabaku.
