Jemi në një moment, ku nuk mund të thuhet se Kombëtarja shqiptare duhet ta ketë problem golin, por kemi të drejtë të themi se problem mund të jetë gjetja e mënyrës për të shkuar te goli. Kemi arritur në një pikë që shumë futbollistë të ekipit kombëtar shënojnë në nivele shumë të larta, deri aty sa edhe Berat Gjimshiti shndërrohet në një bomber.
Nga ana tjetër është detyra e trajnerit aktual Reja se si duhet ta zgjidhë këtë problem, duke dhënë udhëzimet e tij për t’i çuar këta lojtarë sa më pranë golit edhe në ekipin kombëtar.
BROJA
Po t’u hedhim një vështrim të përgjithshëm lojtarëve të repartit sulmues dhe jo vetëm, aty do të gjejmë Armando Brojën që po mahnit Europën me paraqitjet e tij.
Sulmuesi që është në pronësi të londinezëve të Çelsit, por i huazuar te Sauthemptoni ka shënuar 6 gola në Premier Lige dhe është vetëm 20 vjeç. Sulmuesi e gjen shumë lehtësisht rrugën e rrjetës në ekipin e tij, ndërsa për të shijuar golat e tij në Kombëtare, si fillim duhet të sheshohen tensionet mes tij dhe trajnerit Reja. Broja nuk ka shumë minuta me përfaqësuesen, por kujtojmë që shënoi në 289 minuta 3 gola.
CIKALLESHI
Shqipëria nuk vuan për gola, këtë e dëshmon edhe “pyka” kryesore e Kombëtares, Sokol Cikalleshi, i cili ka vendosur një stabilitet në Turqi me Koniasporin, aktualisht ndodhen në vend të dytë në kampionat duke lënë pas ekipe si Beshiktash, Fenerbahçe apo Gallatasaraj, dhe brenda atyre 7 golave që ka shënuar këtë sezon, ka edhe supergola që vetëm ai di t’i bëjë. Eksperienca e tij tani është dyfish e vlefshme për Kombëtaren tonë dhe Reja e di shumë mirë këtë.
UZUNI
Myrto në janar kaloi nga Ferencvaroshi në La Liga te skuadra e Granadës. Në Hungari ai tregoi një marrëdhënie të shkëlqyer me golin, duke u shpallur edhe golashënuesi më i mirë i ekipit dhe gjithashtu shënoi në disa kompeticione, si Champions apo Europa Lige. E mira tjetër e tij është se krijon shumë raste në portën kundërshtare dhe me të në ekip goli mund të vijë nga momenti në moment.
MANAJ
Rei Manaj ka bërë një kthesë të madhe në karrierën e tij. Sulmuesi tashmë tregon veten si një person me këmbë në tokë dhe merr përgjegjësitë mbi supe, ashtu siç i takon një futbollisti profesionist. Manaj është rritur shumë në një kohë të shkurtër në Serinë A.
I qetë, i duruar dhe bamirës në shumicën e rasteve, Manaj i ka surprizuar të gjithë. Lushnjari ka shënuar pak ditë më parë golin e tretë në Serinë A me Specian, por përveç kësaj ka treguar edhe një shpirt luftarak në fushë, gjë që mezi po pret ta bëjë edhe në Kombëtare.
VRIONI
Xhakomo Vrioni mund të jetë pasuesi i duhur i Cikalleshit në të ardhmen. Sulmues tipik, shtatlartë dhe i fuqishëm, cilësi që i shfrytëzon në Austri, aty ku është huazuar nga Juventusi, ku ka shënuar 10 gola në 14 ndeshje me Tirolin.
GJIMSHITI
Mbrojtës, por një nuhatës i paparë i golit. Berat Gjimshiti shfrytëzon maksimalisht goditjet e këndit dhe ato standarde, sa herë që i jepet mundësia. Këtë javë që kaloi u bë protagonist në Europa Ligë, duke i dhënë fitoren Atalantës ndaj Olimpiakosit me dygolëshin e tij.
/Panoramasport
