Prej orës 12:00 të kësaj të mërkure, kryeministri Edi Rama ishte i ftuari kryesor në Komisionin Hetimor për Inceneratorët.
Dëshmitar për të shpjeguar dhe hedhur dritë mbi aferën 430 milion euro të cilat u dhanë nga buxheti i shtetit për tre incenerator, atë të Fierit, Elbasanit dhe Tiranës.
Ndërsa qëndronte i ulur në karrigen e dëshmitarit, pas shpinës së Ramës qëndronin të ulur në rresht 6 këshilltarët e tij. Pesë meshkuj dhe një femër qëndronin pranë tij pa folur dhe me nga një dosje në dorë dhe gjatë gjithë kohës mbanin shënime.
Por më shumë sesa vëmendja për të shënuar çdo pyetje dhe përgjigje rreth temës tepër të diskutuar, këshilltarët herë pas here shiheshin duke qeshur apo nënqeshur.
Ajo që shihej, të linte përshtypjen se Edi Rama ishte ulur në atë karrige për të bërë shou dhe jo për të zbardhur aferën e firmosur nga ministrat e tij dhe si për ironi të fatit, ai nuk kishte dijeni për shumë gjëra.
Rama në pjesën më të madhe u mundua të mos i përgjigjej pyetjeve, madje në disa raste dukej shumë i tensionuar.
Një skenografi e mirëpërgatitur për të larguar vëmendjen nga skandali që ka pushtuar vendin dhe që për momentin është duke u hetuar edhe nga SPAK.
Kujtojmë se kryeministri Rama në disa raste nuk donte të jepte asnjë shpjegim, ndërsa nuk mbante mend se çfarë vendimesh kishte marrë në mbledhjen e qeverisë në dhjetor 2014 dhe shumë të tjera më pas .
Rama gjithashtu i doli në mbrojtje Klodian Zotos dhe mirel Martirit e stela Gugalljes, kur tha se nëse do të kthehej mbrapa në kohë do të bënte të njajtat veprime dhe do t’u jepte sërish konçesionin këtyre personave.
