Gjykata e Durrësit, ka vendosur të lirojë Klajdi Xibrakun, njërin nga aksionerët e kompanisë “Masabi Fruits”.
Kjo kompani ishte pritëse e kontejnerit me banane ku u gjetën plot 143 kg kokainë e pastër e ardhur nga Ekuadori.
Kokaina ishte mbështjellë me një ambalazh ku ishte vendosur fotoja e Pablo Eskobar dhe mbishkrimi “El Mijor”.
Më përpara më 18 janar 2022, gjykata e Apelit Durrës kishte liruar edhe ortakun Erion Peti.
Ngarkesa me 143 kilogram kokainë u sekuestrua më 10 prill 2021 në Portin e Durrësit, pas një hetimi të nisur nga SPAK në bashkëpunim me prokurorinë lokale.
Të dy kushërinjtë bashkëpronarë të kompanisë “Masabi Fruits” u arrestuan menjëherë pas sekuestrimit të ngarkesës të dyshuar si të implikuar në këtë linjë trafiku.
Ata vetë e patën mohuar të kenë lidhje me tentativën e trafikut të drogës.
Ndërsa gjatë marrjes në pyetje kanë pranuar se për shkak të biznesit që kishin, kanë udhëtuar disa herë në Ekuador me qëllim lidhjen e marrëveshjeve dhe kontratave për blerjen e bananeve dhe frutave të tjera ekzotike.
/Ora News/
