Kryeministri Edi Rama do të dëshmojë sot para Komisionit Hetimor parlamentar për inceneratorët, i cili zhvillon seancën e fundit dëgjimore me ata që konsiderohen herë si dëshmitarë dhe herë si pjesë e një grupi të strukturuar kriminal në aferën më të madhe të 30 viteve të fundit.
Rama do të paraqitet para Komisionit në orën 12:00, ndërsa një ditë më parë deklaroi se “mezi po pret që të jetë në sallën e Komisionit Hetimor”.
Kryeministri Edi Rama paraqitet para një komisioni hetimor paralamentar si dëshmitar, por me akuza publike në kurriz, për herë të dytë në 20 vite.
Në vitin 2003 ai u përball me Komisionin Hetimor i njohur si “Olldashi” lidhur me lejet e ndërtimit, fasadat, projektet infrastrukturore etj, ndërsa hetimi në atë kohë përfshinte jo vetëm periudhën si Kryebashkiak por edhe atë të ministrit të Kulturës.
Komisioni Hetimor parlamentar për incineratorët dëgjoi ditën e djeshme dëshmitë e kryetarit të bashkisë së kryeqytetit, Erjon Veliaj, Sekretarit të Përgjithshëm të Këshillit të Ministrave, Engjëll Agaçi, ish-ministrit Damian Gjiknuri, ndërsa deputeti Alqi Bllako nuk dha dëshmi, pasi kishte frikën e nxjerrjes së sekretit hetimor, duke qenë se ishte një nga personat e thirrur nga SPAK.
Hetimet janë një përpjekje për të hedhur dritë mbi dyshimet, se zyrtarë të lartë kanë abuzuar fondet publike në miliona euro me 3 incineratorët mbetjeve urbane në Elbasan, Tiranë dhe Fier.
Komisioni po heton për dyshimet për korrupsion me miliona euro dhe shkelje ligjore me lejet dhe financimet e ndërtimit të tre incineratorët e mbetjeve në Elbasan Fier dhe Tiranë, procedura që kanë nisur 6 vjet më parë.
Kryeministri Edi Rama ka deklaruar se partia që ai kryeson nuk është zyrë avokatie e askujt që dyshohet se ka shkelur ligjet, se kushdo zyrtar i akuzuar, që mund të ketë abuzuar me fondet publike duhet të përgjigjet personalisht para hetuesve dhe ka marrëdhënie personale me SPAK.
Ish ministri i mjedisit, Lefter Koka, u arrestua për shpërdorim detyre, pastrim parash dhe rryshfete 3.7 milionë euro gjatë procedurave për incineratorin e Elbasanit.
Nga dëshmitë e dhëna një ditë më parë rezultuan shkeljet në rastin e inceneratorit të Tiranës, për të cilin nuk ka njv vendim të këshillit bashkiak, por as edhe një leje ndërtimi, për ngritjen e strukturës së inceneratorit. Gjithsesi Erion Veliaj tentoi ta kthejë seancën në një show, duke përdorur batuta kryesisht ndaj kryetares së Komisionit Hetimor, Jorida Tabaku.
