Një bankë e nivelit të dytë në kryeqytet dyshohet se ishte vënë në shënjestër të një grupi grabitësish.
Sipas burimeve policore, grupi i grabitësve ende i paidentifikuar kishte planifikuar të hynte në bankë nëpërmjet kanaleve të nëndheshme të ujërave të zeza në Bulevardin Zogu i Parë.
Hyrja për në kanalet e nëndheshme për tek banka është rreth 200 metra larg.
Ditën e djeshme, forca të shumta policie ushtruan kontrolle në kanalin në Bulevardin Zogu i Parë, por nuk dihet nëse është arritur gjetja e ndonjë materiali që mund te çojë në identifikimin e autoreve.
Burime bëjnë me dije se plani për të vënë në jetë grabitjen ka qenë në fazën e planifikimit.
Zyrtarisht, policia njoftoi se janë duke kryer hetime të thelluara.
“Shërbimet e Policisë, në bazë të informacioneve të siguruara në rrugë operative, se në bulevardin ‘Zogu I’ po kryheshin gërmime, duke përdorur tunele të nëndheshme, me qëllim depërtimin në ambientet e brendshme të një banke të nivelit të dytë, falë reagimit të menjëhershëm, kanë bërë të mundur parandalimin e vjedhjes në bankë. Shërbimet e Policisë janë duke kryer hetime të thelluara me qëllim identifikimin, kapjen e autorëve dhe vënien e tyre para përgjegjësisë. Materialet hetimore i kaluan Prokurorisë së Rrethit Gjyqësor Tiranë, për veprime të mëtejshme procedurale, për veprën penale ‘Vjedhja e bankave dhe arkave të kursimit’ kryer në bashkëpunim”, thuhet në njoftimin e bluve.
