Prej disa vitesh, klubi i Partizanit ka nisur të ndërtojë kompleksin e vet në periferi të Tiranës. Presidenti Gaz Demi po investon për atë projekt gjigand dhe tashmë stadiumi është drejt fundit. Një kontribut të madh po jep edhe Federata Shqiptare e Futbollit. Ka qenë pikërisht kjo e fundit që ka mundësuar tapetin e stadiumit që do të ketë një kapacitet prej 4 mijë vendesh. Mirëpo, institucioni i futbollit në vend nuk do të ndalet këtu.
Sipas projektit, në kompleksin e ri do të ndërtohen dhe 3 fusha të tjera që do të shërbejnë për ndeshjet e moshave si dhe stërvitjen e ekipit të parë. Pikërisht dy prej tyre do të ndërtohen sërish nga Federata Shqiptare e Futbollit. Megjithatë problem është bërë qeveria. Mësohet se ende nuk është dhënë leja për shembjen e disa ndërtesave që më parë ishin reparte ushtarake. Pikërisht aty do të bëhen fushat stërvitore, për të cilat do të kontribuojë FSHF-ja./Newsport.al
