Deputeti i PD-së Oerd Bylykbashi, ishte i pranishëm në prezantimin e kandidatit të ‘Shtëpisë së Lirisë’, Ardian Muka në një takim me banorët e Hidrovorit, Hamallaj.
Bylykbashi ka theksuar se zgjedhjet e 6 marsit jo vetëm do sjellin fitoren e Bashkisë Durrës, por do sjellin një moment të rëndësishëm për të filluar rrëzimin e regjimit të Ramës.
Bylykbashi ka sulmuar edhe ish-kryetarin Lulzim Basha duke e akuzuar se në marrëveshje me Ramën po mbysnin dhe asfiksonin demokracinë dhe pluralizmin në vend.
“E kemi filluar këtë fushatë për zgjedhjet e 6 marsit për të fituar bashkinë e Durrësit, në këto votime që na japin shancin që pas 22 vitesh që socialistët e kanë marrë për ta grabitur deri në palc dhe më 6 mars tja kthejmë qytetarëve të Durrësit nga Ishmi deri në Rromanat.
Në 6 mars, me zemrën plotë dhe besim në fitore, do i japim jo vetëm Ardian Mukës që do të na përfësojë të gjithë ne, por do të jetë dhe një moment i rëndësishëm politik për të filluar rrëzimin e Ramës nga pushteti në të gjithë Shqipërinë.
6 marsi do të jetë momenti kur ne do të fillojmë të kthejmë demokracinë në shina dhe pluralizmin i cili në këto vite, në një marrëveshje okulte po mbytej po asfiksohej në një pazar me Ramën të bërë nga Lulzim Basha”, tha Bylykbashi.
