Tirana zyrtare ka reaguar pas akuzave të ministrit të Jashtëm të Rusisë, Sergey Lavrov, i cili u shpreh se në Ukrainë kanë shkuar mercenarë nga Shqipëria dhe Kosova për të luftuar kundër separatistëve rusë në rajonin e ndarë Donbas.
Ministria për Europën dhe Punët e Jashtme hedh poshtë akuzat e Lavrov si dhe njofton se në shenjë proteste ka thirrur ambasadorin rus, Mihail Afanasiev, për t’i kërkuar përgënjeshtrimin e lajmit.
Reagimi
MEPJ hedh poshtë kategorikisht pretendimet e publikuara sot në agjencinë e lajmeve ruse TAS dhe dyshimet e ngritura nga Ministri i Jashtëm Rus, Sergei Lavrov, për praninë e “mercenarëve shqiptarë” në Ukrainë.
Në shenjë proteste është thërritur Ambasadori i Federatës Ruse të cilit i është kërkuar përgënjeshtrimi i lajmit.
Ministri i Jashtëm i Rusisë, Sergey Lavrov, pretendon se mercenarë nga Shqipëria, Kosova dhe Bosnjë-Hercegovina janë dërguar në Donbas, krahinën e Ukrainës, të ndarë mes qeverisë së Kievit dhe separatistëve të mbështetur nga Moska.
“Rusia ka informacione se mercenarë nga këto shtete janë dërguar atje”, tha Lavrov, i cituar nga “Sputnik”.
Lavrov tha se “Rusia po i verifikon me shumë kujdes informacionet që ka mbledhur për rekrutimin e mercenarëve, për të luftuar në Donbas”.
