Lulzim Basha ka hedhur akuza në drejtim të Kryeministrit Edi Rama dhe ish-Kryeministrit Sali Berisha, duke vendosur shenja barazimi mes tyre, ndërsa të parin e konsideroi si regjim, ndërsa tjetrin si patericë të tij.
Basha u ndal në aferën e inceneratorëve, ndërsa vlerësoi punën e Komisionit Hetimor të drejtuar nga Jorida Tabaku. Ai tha se ky komision po zbulon dokumente mbi aferën e cila është e denjë për mafien.
“Në aferë janë të përfshirë zyrtarët më të lartë të shtetit, siç ishte dhe dëshmia që inceneratori i Elbasanit u prokurua pa prokurim. A do të ndodhte kjo pa përfshirjen e Edi Ramës? Përgjigja ishte qesharake? Që do ta pësojë kush ka lyer gishtin pas kurrizit të qeverisë.
Edi Rama merr në mbrojtje një aferë korruptive kriminale.
Bëni një eksperiment, sa kohë do që të miratohet një Vendim i Këshillit të Ministrave, dhe që të na e thojë Edi Rama se si kjo mund të bëhet për 8 orë. Pyetja më kryesore: a mund të ndodhin këto pa dijeninë, miratimin dhe përfitimin e Edi Ramës”, tha Basha.
Sipas tij, opinioni publik është njoftuar se kjo është një skemë e strukturuar, e ka kuptuar po kështu që këta njerëz në fakt nuk janë pronarët e vërtetë, por janë politikanët.
“Janë 3 grupe, ne dhe shqiptarët që po denoncojmë, grupi tjetër janë ata që janë kapur me presh në duar, ata që jabë në krye të qeverisë, ata që sa herë që ne denoncojmë ata dalin dhe flasin për gjithçka, targeti i preferuar janë sulmet nda PD, dhe grupi i tretë nuk është pjesë e PS, por duan njësoj të heqin vëmendjen. Ata që kanë dalë sot nja tre katër herë para jush dhe duan të tërheqin vëmendje. Ka një palë që i intereson dalja e së vërtetës deri në fund, dhe dy palë të tjera, një që do ta çojë deri në fund, dhe tjetra do që ta minimizojë.
Çdo ditë do të dëgjoni nga një akuzë të re, ose të vjetrat që riciklohen, duan të heqin vëmendjen nga beteja që ne po bëjmë në emër të interesit publik. Nuk kursejnë asnjë shpifje dhe asnjë gënjeshtër.
Jemi ndarë qartësisht në dy grupe: regjimi dhe paterica e regjimit, dhe grupi i dytë PD dhe shqiptarët”, tha Basha.
