Loran Dusha, administratori i kompanisë që ka koncesionin e inceneratorit të Fierit, nuk i është përgjigjur thirrjes së komisionit hetimor për të dëshmuar këtë të Mërkurë.
Drejtuesja e komisionit hetimor Jorida Tabaku bëri me dije se Loran Dusha, Administrator i “Integrated Technology Waste Treatment Fier”, ka pasur një korrespondencë të gjatë me komisionin ku shprehur vullnetin për të dëshmuar. Por, shtoi ajo, ai ka referuar thirrjen për të dëshmuar duke deklaruar se është i infektuar me koronavirus.
Ajo hodhi dyshime se dokumenti i sjellë mund të jetë i falsifikuar, pra Dusha mund të mos jetë pozitiv me koronavirus, por ka blerë në mënyrë të paligjshme rezultatin e testit pikëtisht për t’iu shmangur përballjes me deputetët në komision.
Tabaku shtoi se Dusha do të thirret të dëshmojë përmes platformave online të Premten.
“Do ti kërkoj kuvendit që të dëshmojë përmes teknologjisë. Do e riskeudulojmë për ditën e premte. Dhe do dëshmojë në këtë komision. Zoti Loran Dusha do vi dhe do dëshmojë përmes platformave online. Për të hënën në mëngjes nëse nuk lidhet. Nëse nuk përgjigjet për thirrjen e katër do njoftoj policinë, ta marrin policë me covid ta sjellin këtu, le të sëmuremi të gjithë me covid por do ta dëgjojnë zotin Dusha”, tha Tabaku.
