Ardian Muka, kandidat i koalicionit “Shtëpia e Lirisë” dhe Luan Hoti, kandidati i Lulzim Bashës për Bashkinë e Durrësit, vijojnë takimet me qytetarët në kuadrin e zgjedhjeve të pjesshme vendore të 6 marsit.
Muka ishte në një takim me banorë të lagjes nr 14, ndërsa Hoti vijon takimet derë më derë. Muka ka evidentuar problemin e përmbytjeve në Durrës, ndërsa Hoti ka premtuar kthimin e bashkisë te qytetarët.
“I përulur ndaj pritjes që më bënë qytetarët e lagjes nr. 14, ku biseduam për Shkozetin, lagje në të cilën jam rritur.
Janë shpenzuar 86 milionë dollarë për ujësjellës e kanalizime. Të gjithë jemi dëshmitarë që rrugët përmbyten dhe ujë të pijshëm nuk kemi më shumë se 1 orë në ditë!
Kam besimin që të gjithë bashkë në zgjedhjet e 6 marsit do zgjedhim vetëm për interesin e Durrësit”, shkruan Muka në rrjetin social.
Ndërkohë, kandidati Luan Hoti shprehet se beteja e tij është për qytetarët!
“Qyteti do t’u rikthehet qytetarëve dhe vlerave dhe unë do të jem këtu të marr vendime në interes të qytetarëve dhe bashkë me qytetarët!”, shprehet Hoti.
