Shoqata e të përndjekurve politikë dhe Balli Kombëtar Demokrat mbështesin kandidatin e “Shtëpisë së Lirisë” në Durrës, Ardian Muka.
Përmes një deklarate të shpërndarë për mediat, Shoqata Antikomuniste e të Përndjekurve Politikë, Dega Durrës, thotë se Muka ka dalë kandidat nga primaret e PD dhe si i tillë do të ketë mbështetjen e tyre.
“Në kushtet kur një nga anëtarët e shoqatës sonë, anëtar i kryesisë së shoqatës dega Durrës dhe njëkohësisht dhe anëtar i Këshillit Kombëtar të Shoqatës, zoti Ardian Muka është kandidati i dalë nëpërmjet primareve nga Komisioni i Rithemelimit, ne mbështesim këtë kandidaturë duke i ftuar të gjithë anëtarët e shoqatës sonë, të gjithë të përndjekurit politik ta mbështesin kandidaturën e ta votojnë zotin Ardian Muka, në zgjedhjet e datës 6 mars”, thuhet në deklaratë.
Ndërkohë në deklaratën e degës së Ballit Kombëtar Demokrat thuhet se “zoti Muka përçon vlerat e një njeriu qytetar, të kulturuar, i cili ka trashëguar vlerat e djathta e që rrjedh nga një familje e djathtë, në përputhshmëri të plotë me parimet që Partia e Ballit Kombëtar Demokrat ka, e kemi parë këtë kandidaturë si atë që plotëson kushtet për ta mbështetur”.
