Dy persona janë arrestuar në Poliçan për veprat penale “Vjedhja me dhunë” dhe “Shkatërrimi i pronës”, të kryera në bashkëpunim.
Policia njoftoi se gjatë natës, në vendin e quajtur “Përroi i Xhenjos”, dy shtetas kanë zbritur me dhunë nga mjeti i tij A.B. dhe pasi ia kanë marrë mjetin, janë larguar me shpejtësi.
Shërbimet e Policisë, pasi morën njoftim për rastin, kanë organizuar punën duke ushtruar kontrolle dhe si rezultat kanë bërë të mundur identifikimin dhe lokalizimin e autorëve, të cilët në tentativë për t’iu larguar shërbimeve të Policisë, janë përplasur me murin anësor të rrugës, duke shkaktuar vetëm dëme materiale.
Në përfundim të veprimeve, specialistët e Seksionit për Krimet në Stacionin e Policisë Poliçan bënë arrestimin në flagrancë të shtetasve V.K., 36 vjeç, banues në Poliçan dhe R.Z., 54 vjeç, banues në Gramsh.
