Amaros Deda, 32 vjeçari i cili ndërroi jetë ditën e sotme në spitalin e Lezhës pas një plagosje me armë zjarri, ka pasur precedentë të mëparshëm penalë.
Deda ka qenë i dënuar më parë për veprën penale të grabitjes me dhunëq ndaj një të moshuare në Shënkoll. Ngjarja për të cilën është arrestuar Deda ka ndodhur në 2011, kohë kur ai ishte 22 vjeç dhe bashkë me një tjetër person kanë hyrë në një banesë në Shënkoll ku kanë keqtrajtuar një të moshuar 70 vjeçare me qëllim grabitjen e parave.
Në atë kohë policia raportonte se kishte arrestuar dy persona, njëri prej të cilëve Amaros Deda, pasi kishin hyrë në banesën e shtetases Gj.R. Sipas policisë, ata kanë qenë me maska dhe të armatosur në momentin që janë futur në banesën e 70-vjeçares.
Ata e kanë lidhur dhe me pas keqtrajtuar, duke i kërkuar t’u tregonte vendin ku mbante paratë. Në momentin e ngjarjes e moshuara ka qenë e vetme në banesë. Sipas raportimeve të asaj kohe, 70-vjeçarja kishte marrë dëmtimet më të shumta në kokë pasi e kanë goditur me mjete të forta.
