Lulzim Basha, në një deklaratë për gazetarët para se të futej në parlament, argumentoi pse do të votojë nismën e mazhorancës për zgjatjen e mandatit të KPK-së dhe Komisionerit Publik.
Basha tha se nëse sot nuk votohen ndryshimet kushtetuese, atëherë vetingu do të bëhet nga KLGJ e KLP dhe sipas tij, këto institucione janë të kapura nga mazhoranca.
Po ashtu, Basha tha se vota pro do të jetë për hir të integrimit.
“Sot nuk është drejtësia që duam, por do të ishte më keq nëse një proces i nisur me qëllim që të përfundojë me një drejtësi që ndëshkon politikanët e korruptuar, do të mbetej në mes dhe po kështu do të ndërpritej integrimi i vendit në BE. Prandaj, ne po bëjmë atë që kemi thënë”, tha Basha.
“Për hir të integrimit, do t’i japim shansin një drejtësie që të korrigjohet dhe t’u hedhë prangat çdo qytetari shqiptar që shkel ligjin, duke e nisur nga më të pushtetshmit. KLGJ dhe KLP janë të kapura nga socialistët, të paktën te vetingu kemi garanci nga ndërkombëtarët”, u shpreh Basha.
Pas deklaratës së tij, ish-kryeministri Sali Berisha postoi një video në rrjetet sociale të Lulzim Bashës i cili shpreh një qëndrim ndryshe nga ky i sotmi.
“…Bëheni vetingun se do hapim negociatat, në shqip kësaj i themi broçkull…”, thotë Basha në videon e postuar nga Berisha.
Ish-kryeministri, në komentin që shoqëron videon, shkruan: Sot “bërtet” votoni Vetingun per Integrimin! Por ja si i drejtohej dikur Lul Brava përfaqësuesve europiane!
