Ministri i Mjedisit Lefter Koka ka qenë mjaft i ashpër në një intervistë në studion e Ora News. Eksponenti i lartë i LSI-së pranoi tensionet brenda mazhorancës së majtë që sipas tij kanë për bazë mos-mbajtjen e premtimeve. Ai nuk ka lënë mënjanë as kolegun e tij ministër të brendshëm, Saimir Tahiri që sipas tij bën “show” me luftën ndaj kanabisit i cili ka marrë shtrirje kombëtare.
“U bëj thirrje eksponentëve të policisë së shtetit mos ikën në drejtim të paditur. Po bëhemi gazi i botës me kanabisin. Detyra e policisë së shtetit të parandalojë një krim, dhe jo më të mos jetë në gjendje të parandalojë mbjelljen e një bime”– tha ministri i LSI-së duke shtuar: “Fenomeni i kanabisit është fenomen kombëtar. Realiteti është i prekshëm. E gjitha pjesa e zonës së Durrësit kanë qenë të mbjella me kanabis, të mbjellësh kanabis kërkon punonjës për vaditje, për prashitje, në çdo rast disa pemë ka pasur ndërhyrje nga policia, me të njëjtin shou. Janë disa njerëz që kanë lidhjet e tyre, kjo vjen ku ka nepotizëm me njerëzit që bëjnë këtë aktivitet të paligjshëm” – tha Koka.
Një tjetër akuzë e rëndë ishte ajo me rritjen e kriminalitetit në Durrës.
“Durrësi është një qytet po hesht. Në qendër të Durrësit, nëse ndodh një krim, rrugët janë të hapura” – tha Koka.
