Një zjarr ‘i dhunshëm’ shpërtheu në një fabrikë të shtypjes së parave në Francë.
Sipas mediave të huaja, përcjell Telegrafi, pamjet dramatike tregojnë tymin që ngrihet nga shtypshkronja e Banque de France në Chamalières të mërkurën.
Zjarri u përhap pasi shpërtheu në një “dhomë të kufizuar”, raporton Le Bien Public.
Siç bëhet e ditur më tej, thuhet se rreth 400 njerëz janë evakuuar ndërsa rreth 70 zjarrfikës u nisën për në vendngjarje në orën 10:15.
Rreth 24 persona besohet se janë lënduar lehtë, me disa raporte që sugjerojnë se mund të ketë pasur deri në 39 të lënduar.
Të paktën katër persona u dërguan në spital, duke përfshirë dy zjarrfikës, thuhet në një raport të publikuar nga prefektura.
Zjarri ishte vënë kryesisht nën kontroll deri në mesditë dhe nuk mbetet asnjë rrezik për vendasit, thanë zyrtarët.
Shkaku mbetet i panjohur dhe ka nisur hetimi ndërkohë që zyrtarët thanë se nuk përfshiheshin produkte toksike.
Duke postuar në Twitter, Banque de France tha: “Zjarri është nën kontroll, vendi është evakuuar dhe punonjësit janë të sigurt”.
