Përhapja e Omikronit po e çon pandeminë drejt fundit. Këtë beson imunologu italian Serxho Abrinjani, i cili në një intervistë për shtypin italian e konsideron fazën aktuale, si “bishtin e pandemisë”.
“Jemi në bishtin e pandemisë dhe mund të mendojmë të rimarrin një nga një të gjitha liritë e humbura në dy vitet e fundit. Për këtë jap edhe firmën time, nëse virusi qëndron këtë fazë me Omikronin dhe nuk ndryshon më”.
Virologu i spitalit universitar të Milanos thotë megjithatë se vështirë të shfaqet një variant më ngjitës se Omikroni. Me shumë gjasa, variantet e Omikronit, si i pari ashtu edhe i dyti, do ta shndërrojnë COVID-in në një virus endemik. Të vaksinuarit me tre doza, sipas virologut, kanë simptoma të lehta në rast infektimi.
Niveli i pandryshueshëm i rasteve të vdekjeve dhe shtrimeve në terapinë intensive, pavarësisht infektimeve rekord me Omikron, po u jep mundësi qeverive europiane të zbusin masat. Italia vendosi heqjen e detyrimit të mbajtjes së maskave ne ambiente te hapura.
Ndërsa për ministrin gjerman të Shëndetësisë, lehtësimi i masave do ta zgjaste valën e Omikronit. Ai kritikoi vendimin e rajonit të Bavarisë që njoftoi nisjen e lehtësimit të plotë të masave duke nisur nga festa e pashkëve, që shkon përkundër linjës së qeverisë gjermane.
