Një ngjarje e rëndë ka tronditur këtë mëngjes qytetin e Fierit, ku një grua 50-vjeçare është gjetur e vdekur në banesë me plagë që dyshohet se u shkaktuar nga goditje me thikë.
Fillimisht ngjarja u raportua si vetëvrasje, por mënyra sesi viktima kishte marrë plagët vdekjeprurëse nga goditja me një thikë, sillte dyshime se nuk mund ta kishte kryer vetë aktin fatal.
Burime nga policia bëjnë me dije se viktima Valdete Manaj dyshohet se është qëlluar 6 herë me thikë në gjoks, nga bashkëshorti i saj Petri Manaj.
Raportohet se çifti prej kohësh ka pasur probleme, ndërsa dyshohet se autori kur ka kryer krimin ka qenë në gjendje të dehur.
Çifti ka dhe një djalë, i cili raportohet se është nisur për në Gjermani ku ndodhet edhe vajza e çiftit, ndërsa më pas ka ndodhur edhe krimi.
Policia konfirmoi se i arrestuari ka pranuar autorësinë e krimit.
“Pas njoftimit të marë në sallën operative se në lagjen ‘Sheq i Madh’, Fier, në banesën e saj një shtetase është vetëvrarë, menjëherë është ngritur grupi hetimor dhe në bashkëpunim me Prokurorinë Fier kanë vijuar punën për zbardhjen e plotë të rrethanave të ngjarjes. Nga provat e grumbulluara, deklarimet e marra, këqyrjes së trupit të viktimës nga eksperti mjeko-ligjor dhe veprimet e mëtejshme hetimore të kryera nga grupi hetimor në bashkëpunim me Prokurorisë Fier, rezulton se shtetasi Petrit Manaj, bashkëshorti i viktimës, për motive të dobëta ka goditur me thikë shtetasen Valdete Manaj, e cila për pasojë ka gjetur vdekjen”, njoftoi policia.
“Në bazë të hetimeve të thelluara, i vendosur përballë provave të adminstruara, shtetasi Petrit Manaj, ka pranuar autorësinë dhe motivin e ngjarjes. Në vijim të veprimeve, specialistët për Hetimin e Krimeve në Komisariatin e Policisë Fier arrestuan në flagrancë për veprën penale ‘Vrasja në rrethana të tjera cilësuese’, shtetasin Petrit Manaj, 56 vjeç. U sekuestrua në cilësinë e provës materiale mjeti prerës (thikë), me të cilën dyshohet se autori ka kryer vrasjen. Materialet do i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale“, shtuan të njëjtat burime.
