KAS ka rrëzuar ankimin e Lulzim Bashës në emrin e PD për koalicionin “Shtëpia e Lirisë”. Përfaqësuesi i Bashës kërkoi mosregjistrimin e koalicionit për zgjedhjet e pjesshme lokale.
Në animimin, thuhet se kur LSI dhe PDK bënë kërkesën për koalicion nuk ishin regjistruar për të marrë pjesë në zgjedhje dhe kjo është në kundërshtim me Kodin Zgjedhor. Po ashtu, më tej, ankimimi ndalet te Komisioni i Përkohshëm i Rithemelimit. “Kërkesa dhe marrëveshja referojnë te një subjekt ‘Komisioni i Përkohshëm i Rithemelimit’, i cili jo vetëm nuk është i regjistruar si subjekt zgjedhor, por as nuk rezulton të ekzistojë si parti politike”, thuhet në ankim.
Komisioneri Shtetëror i Zgjedhjeve, Ilirjan Celibashi, regjistroi koalicionin e partive LSI dhe PDK nën logon “Shtëpia e lirisë” në zgjedhjet e pjesshme vendore të 6 marsit, por nuk futi në listën e anëtarëve të këtij koalicioni Komisionin e Rithemelimit.
