Lulzim Basha vijon akuzat ndaj kandidatëve të koalicionit “Shtëpia e Lirisë” në zgjedhjet e pjesshme të 6 marsit, të cilët u zgjodhën nga anëtarësia e PD përmes primareve.
Duke u ndalur te kandidati i Dibrës, Premtim Kryemadhi, në postimin në rrjetet sociale, thuhet se kandidati në Dibër është poshtërimi që Sali Berisha ju bën demokratëve.
“Kandidimi në Dibër i bashkëshortit të prokurores që mbrojti bandën e Edi Ramës, duke mos hetuar dosjen 184 të vjedhjes së zgjedhjeve në Dibër, është poshtërsi dhe tallje me dibranët dhe demokratët dibranë që masakrën zgjedhore e provuan të parët në 2016.
Premtim Kryemadhin nuk e lidh asgjë me demokratët, por përzgjedhja e tij sqaron më së miri komunikimin privat të Flamur Nokës me Ulsi Manjën. Nëse bashkëshortja e Kryemadhit do të hetonte dosjen 184, Ulsi Manja do ishte në burg.
Tashmë skema e bashkëpunimit Rama-Meta-Berisha është e qartë për çdo shqiptarë.
Po zgjodhe Sali Berishën e Ilir Metën mban Edi Ramën. Nëse zgjedh Edi Ramën mban Sali Berishën dhe Ilir Metën”, thuhet në reagimin e bërë publik në faqen zyrtare të PD në rrjetet sociale, që administrohet nga Basha dhe mbështetësit e tij.
