Presidenti Ilir Meta i është drejtuar me një shkresë kryetares së Gjykatës Kushtetuese përmes së cilës i kërkon t’i vihet në dispozicion procedura e ndjekur për të përcaktuar çështjen e shkarkimit të tij.
Meta kërkon aktin për pezullimin e çështjes dhe cila është baza ligjore e përdorur.
“Pse u shkel afati ligjor 3-mujor i shqyrtimit të çështjes”, pyet kreu i shtetit, ndërsa shton se priste vendimmarrje të shpejtë.
“Kërkoj nga ana juaj: – kopje të aktit përmes të cilit rregulloheshin procedurat gjyqësore të Gjykatës Kushtetuese, pas hyrjes në fuqi të ligjit nr. 99/2016 , e veçanërisht procedurat e caktimit të relatorit të çështjes me short, apo procedurat e tjera me të cilat ka funksionuar Gjykata Kushtetuese, deri në miratimin e Rregullores së re, hyrë në fuqi më 27 janar 2022. Mbetem me besimin se ky informacion dhe kopja e akteve do të përcillet dhe do të vihet në dispozicion brenda datës 31 janar 2022”, thuhet mes të tjerash në shkresë.
