Ministrja e Ekonomisë dhe Financave, Delina Ibrahimaj ka mbajtur një konferencë për mediat ku ka prezantuar disa prej vendimeve të ndërmarra nga Këshilli i Ministrave gjatë mbledhjes së sotme.
Ministrja u është përgjigjur edhe pyetjeve lidhur me kontrollet e zhvilluara nga drejtoria tatimore drejt bizneseve të vëllezërve Duka në të njëjtin moment që presidenti i FSHF, Armand Duka ishte përfshirë në një përplasje me kryebashkiakun e Tiranës, Erion Veliaj.
Ibrahimaj u shpreh se diçka e tillë kishte qenë vetëm një rastësi dhe shtoi se administrata e tatimeve funksionon në bazë të procedurave.
Ka akuza se tatimet janë përdorur politikisht ndaj Agron Dukës në të njëjtën ditë po bëhej një debat mes vëllait të këtij të fundit, presidentit të FSHF, Armand Duka dhe kryebashkiakut të Tiranës, Erion Veliajt.
Ministrja e Ekonomisë dhe Financave, Delina Ibrahimaj: Në fakt administrata tatimore funksionon në bazë të ligjeve dhe procedurave tatimore. Rasti në fjalë ishte një rastësi që ka ndodhur në të njëjtin moment. Ka të bëjë me një denoncim të ardhur që administrate duhet ta kryejë pa kaluar afati 7 ditor që rej denoncimit.
