Tirana ka dalë triumfuese në “Air Albania” përballë Dinamos duke marrë tre pikë të vlefshme në luftën për titullin kampion. Sfidën e vendosi goli i Xhixhës në minutën e 69-të të ndeshjes.
Dinamo jep shkëndijat e para të derbit me disa veprime të rrezikshme por pjesa e parë mbyllet pa raste të pastra për të shënuar nga të dyja ekipet.
Pjesa e dytë është më e bukur dhe e luftuar me Hoxhallarin që rrezikon me kokë në 52’ por nuk shënon dot.
Në 56’ ka vend për diskutimt teksa Bardhi kalon në avantazh Dinamon por VAR nderhyn për një prekje me dorë të lojtarit duke anuluar golin.
Me skuadrat e hapura tashmë, Tirana gjen rastin ideal në 69’ ku Xhixha pas një kombinimi me Seferin dërgon në rrjetë topin dhe i jep bardhebluve avantazhin.
Në minutat e mbetura Tirana mund të shënonte dhe të dytin por la dhe hapësira pas teksa ndeshja u mbyll me rezultatin 1-0. Kjo fitore konsolidon vendin e parë për Tiranën që është 6 pikë larg Laçit dhe Kukësit.
