Qëndresa Qytetare do të protestojë të hënën para Ministrisë së Arsimit për mungesën e ngrohjes në shkolla, ndërsa mësimi është pezulluar për tre ditë për shkak të temperaturave të ulëta. Migen Qiraxhi, nga Qëndresa Qytetare, tha në studion e lajmeve të MCN TV se organizatorët në mënyrë simbolike kanë parashikuar të çojnë ngrohëse te ministria.
Ne e dimë që kur është ftohtë duhet të ndizen ngrohëset dhe kur është shumë ftohtë të shtohet numri i ngrohëseve. Nuk është hera e parë që bën ftohtë. Askush nuk pretendon se i ftohti do ikë dhe kjo do zgjidhet. Të gjithë indinjatën, edhe në mënyrë simbolike, do ta shpërfaqim para ministrisë dhe do të çojmë aty disa nga ngrohëset që ne kemi.
Qiraxhi tha se është absurde të mungojë ngrohja në shkolla, ndërkohë që taksa e arsimit paguhet nga qytetarët e Tiranës. Përgjatë 5 viteve të fundit, falë kësaj takse, Bashkia e Tiranës ka mbledhur 26 milionë euro dhe mjafton një tekë e motit që mësimi të pezullohet.
Kur flasim për digjitalizim, inceneratorë dhe investime madhore, është absurde të flasësh për mungesën e ngrohjes së shkollave. Në Tiranë prej 5 vitesh qytetarët kanë paguar 26 milionë euro përmes taksës së infrastrukturës për arsimin.
