Presidneti Ilir Meta ka dekretuar 6 Marsin si datën kur do të mbahen zgjedhjet e pjesshme lokale në 6 bashki të vendit.
Përmes një reagimi, kreu i shtetit uron që ky proces të jetë një shembull i besimit te demokracia dhe vota e lirë.
Në një postim në rrjetet sociale, Meta shprehet: “Sapo dekretova caktimin e datës 6 mars 2022, për zhvillimin e zgjedhjeve të pjesshme vendore për kryetar bashkie në Shkodër, Dibër, Durrës, Vorë, Rrogozhinë dhe Lushnjë. Uroj që ky proces të jetë një shembull i besimit te demokracia dhe vota e lirë!”.
Një ditë më parë, kreu i shtetit takoi kryetarin e grupit parlamentar të Partisë Socialiste, Taulant Balla. Meta u shpreh se nuk do të ketë konsultime me opozitën, por vetëm me Ballën, pasi ishte i shqetësuar dhe dyshonte se mos kishte një bojkot të këtyre zgjedhjeve nga mazhoranca.
