Lulzim Basha u përball sot me një grup të rinjsh dhe grash që e qëlluan me vezë, pak momente se ai të niste një takim me disa gra, në kuadrin e asaj që e konsideroi si vijimin e procesit të riorganizimit të Lidhjes Demokratike të Gruas.
Basha tha se një gjë nuk e shpërfillte dot, gjuhën e urrejtjes ndaj grave nga një grusht njerëzish që sillen me fanatizëm. Dhe ndaj tyre Basha drejtoi thirrjen që të ndalen.
“Historia ka përcaktuar që shoqëritë bëjnë përpara duke zgjedhur modelin e të mirës, modeli i të keqes i shkatërron dhe na ka shkatërruar për një kohë shumë të gjatë. Unë e kam zgjidhur prej kohësh problemin e gjuhës së urrejtjes, që ditën e parë në politikë, kam pyetur cili është sekreti, mund të jetë ndoshta edhe gjenetik edhe kulturor, shpërfillja. Një gjë nuk e shpërfill dot, gjuhën e urrejtjes ndaj grave. Gjuha e urrejtjes ndaj nënave apo fëmijëve të nënave, nga një grusht njerëzish që sillen me një fanatizëm, me një verbëri, që nuk e kam parë e kam dëgjuar as nga kundërshtari politik, as ndaj kundërshtarit politik. Atyre ju them ndaluni sa nuk jeni vonë. Ia them qetësisht por vendosmërisht, ndalni sa nuk jeni vonë. Gjithçka ju fal, por harrojeni se jua fal gjuhën e urrejtjes ndaj grave demokrate”, tha Basha.
Në vijim ai shtoi se për të tjerët dora ime është e shtrirë, siç e thashë jashtë ka edhe, kishte ndoshta, s’pashë, kryesisht disa djem të rinj, edhe ata kur të qartësohen vendin e kanë në familjen e tyre në qoftë se e konsiderojnë Partinë Demokratike familjen e tyre.
“Është detyra ime dhe e çdo drejtuesi dhe drejtuese, e nënkryetareve të partisë, e kryetares së ardhshme të Lidhjes Demokratike të Gruas, në nivelin qendror dhe në nivel lokal, t’i shtrijmë dorën dhe ti sjellim nga acari dhe hutimi ku i ka çuar gjuha e urrejtjes, gënjeshtrat, sulmet, shpifjet, frika që janë instrumentet e të shkuarës brenda shtëpisë tonë dhe instrumentet fatkeqësisht e të sotmes në shtëpinë e shqiptarëve, në atë seli të uzurpuar padrejtësisht nga një karakter i cili kurrë nuk e ka parë gruan shqiptare si një vlerë, por e ka parë gjithmonë si një fasadë, siç i ka parë dhe gjithë të tjerët”, tha ai.
Basha u shpreh se do të vijojë takimet me demokratët cep më cep, duke folur me të gjithë, edhe me ata të zhgënjyerit, edhe me ata të zemëruar nga masakra e 25 prillit, që duan të dëgjojnë, kanë dhe pyetje, kanë dhe kritika ndaj meje, ndaj bashkëpunëtorëve të mi, ndaj çdokujt.
“Do t’i dëgjojmë të gjithë. Të gjitha ata që se kanë humbur arsyen, apo që ndoshta për një moment e humbën, po iu është rikthyer arsyeja dhe e kuptojnë që këtë betejë nuk mund ta bëjmë për fatin e një njeriu kushdo qoftë ky. Por e bëjmë për fatin e përbashkët, jo thjesht e të gjithë demokratëve, por të gjithë shqiptarëve. Sepse në këtë moment, kështu ka dashur fati, Zoti, në këtë moment të historisë, është përcaktuese për Shqipërinë dhe shqiptarët, mënyra se si ne do t’i prijmë Shqipërisë dhe shqiptarëve”, tha ai.
