Nuk kanë munguar elozhet e ndërsjella mes zyrtarëve shqiptare dhe atyre turq në ceremoninë që po zhvillohet në Laç, lidhur me dorëzimin e 522 banesave që janë rindërtuar me kontributin e Qeverisë turke.
Ministri turk i mjedisit duke iu drejtuar të pranishmëve nuk kurseu ta cilësonte Edi Ramën një kryeministër të çmuar.
Ai tha se mes nesh ekzistojnë lidhje rrënjësore, që na kanë bërë që në ditë të mira të ndajmë gëzimet dhe në ditë të vështira problemet.
“Duke nisur nga ky mirëkuptim, menjëherë pas tërmetit të dy viteve më parë, me udhëzim të Presidentit Erdogan, ne erdhëm në Shqipëri për të ndihmuar popullin mik dhe vëlla të Turqisë. Ne vepruam me të njëjtën ndjeshmëri si në rastet e tërmeteve që goditën zona të Turqisë. Ekipet tona erdhën në Shqipëri dhe identifikuan dëmet. Ne filluam menjëherë punimet për rindërtimin dhe faldenrojmë Zotin që ne po i dorëzojmë sot këto banesa dhe njësi shërbimi”, tha ministri turk.
Ai tha se projektet u hartuan nga e kaluara jonë e lashtë, por duke marrë në konsideratë edhe strukturën lokale.
“Uroj që këto banesa të ofrojnë një jetë të re për vëllezërit e motrat e prekura nga tërmeti”, tha ai, duke shtuar se “ashtu sikundër ujrat që rrjedhin nga Shqipëria dhe derdhen në Danub dhe pastaj qëndrojnë në Detin e Zi, ne do të ndërtojmë ura të reja bashkëpunimi, do të jemi pranë Shqipërisë në çdo kuptim, ashtu sikundër kemi bërë deri më sot”.
