Ministria e Shëndetësisë në Kosovë njoftoi se më 11 janar se janë regjistruar 356 raste të reja me koronavirus, nga 7,258 testime.
Sipas njoftimit, në 24 orët e fundit, janë shëruar 53 pacientë, ndërsa raste aktive janë 2,083.
Sipas infektologut në Klinikën Infektive në Qendrën Klinike Universitare të Kosovës (QKUK) Sali Ahmeti, temperaturë deri në 39 gradë deri në tre ditë me radhë, ethe, kollë e thatë, lodhje, rrjedhje hundësh dhe dhembje muskujsh janë simptomat që manifestojnë pacientët e prekur me koronavirus ditëve të fundit në Kosovë.
Në fund të dhjetorit, autoritetet shëndetësore në Kosovë kanë konfirmuar praninë e variantit Omicron të koronavirusit.
Ky variant, i cilësuar si shqetësues nga Organizata Botërore e Shëndetësisë, është identifikuar për herë të parë në Afrikë të Jugut në muajin nëntor dhe që atëherë është përhapur në qindra vende të botës, duke u bërë dominues në disa.
