Nga Klodian Tomorri
Kryeprokurorja e Tiranës la ditën e pushimit për të qenë në krye të detyrës dhe për të marrë vetë në dorë hetimet tek selia e Partisë Demokratike. Për ironi, pikërisht në vendin ku pak muaj më parë Lulzim Basha e kishte quajtur atë ikonën e korrupsionin dhe krimit. Në fakt, me propozim nga diku tjetër.
E gjendur mes Bashës dhe Berishës tani zonja Ymeraj duhet të vendosë se në cilin krah do ta lëshojë me fort çekanin e akuzës. Me Bashen ka një histori përplasje të fortë. Me Berishën e lidh vendlindja, por dhe diçka tjetër. Të dy nuk janë në ujëra të ngrohta me amerikanët.
Megjithatë kështu si kanë ardhur punët Doktori mund të jetë pasaportë për shumë njerëz. Për Bashën ishte pasaporta që e çoi pa asnjë mundim në krye të opozitës. Për kryeprokuroren ndoshta mund të bëhet pasaporta e vettingut dhe pajtimit me “Rrugën e Elbasanit”. Histori fatësh të kryqëzuara.
Por përtej fateve individuale, tashmë e sigurtë është vetëm një gjë. Shqipërinë e ka pllakosur fati i zi. Ky vend ka patur gjithmonë qeveri të korruptuara. Por asnjë qeveri më parë nuk e ka patur dorën kaq të gjatë sa kjo tani. Me opozitën teknikisht të asgjesuar dhe mediat totalisht të pafuqishme, shqiptarët duhet të luten për mrekulli që të mos vidhen, dhunohen dhe përdhosen nga arroganca e pushtetit pa kufi.
