Valë e papritur acari në Pakistan. 22 persona kanë ngrirë për vdekje pasi bora bllokoi automjetet e tyre ndërsa dhjetëra mijëra vizitorë u gjendën të bllokuar në qytetin malor të Pakistanit, Murree.
Në rrjetet sociale qarkulluan video në të cilat njerëzit shihen të vdekur në makina të bllokuara të mbuluara nga bora. Në ditët e fundit, më shumë se 100,000 makina hynë në Murree, një stacion kodrinor 24 milje larg kryeqytetit të Pakistanit, për të shijuar reshjet e borës.
Të gjitha rrugët që të çojnë në qytetin e kodrës janë mbyllur për shkak të trafikut të rënduar, duke lënë të bllokuara mijëra makina.
Ministri i Brendshëm, sheik Rashid Ahmed, në një video-mesazh tha se turistët që vizitonin zonën në numër të madh për herë të parë në 15 deri në 20 vjet kishin krijuar një krizë të madhe.
Ahmed tha se administratat po punonin për të shpëtuar njerëzit e bllokuar dhe pesë toga të ushtrisë pakistaneze ishin thirrur për të ndihmuar.
