Ish-deputeti Lefter Maliqi ka qenë i ftuar në studion e lajmeve të Fax News, ku ka komentuar zhvillimet e fundit në PD. Ai tha se do të jetë i pranishëm në protestën e thirrur nga ish-kryeministri Sali Berisha në datën 8 Janar, për të nxjerrë nga zyra e tij Lulzim Bashën.
Sipas Maliqit në rast se dera nuk hapet, mbështetësve iu lind e drejta që të shqyejnë derën, ndërsa i quajti lojëra fëmijësh mbylljen e dyerve të PD-së.
“Ish-sekretari i përgjithshëm Gazment Bardhi nuk e dimë nga doli dhe nga u fut, këto janë veprime fëmijësh, të vegjlish, janë drejt fraksionit, dhe godinën do e mbajnë si çerdhe fëmijësh. Se të gjitha këto që po bëjnë tregojnë frikë, cinizëm, nuk mund të mbash dot asgjë me forcë, iku koha e diktaturës. Data 8, ku dhe unë do të jem pjesë, për marrjen zyrtare të selisë demokrate, dhe për nisjen e një procesi hapje në bazë, deri në 22 Mars, ku do të zgjidhet kryetari i ri.
Luli vazhdon të mbajë peng PD-në deri në datën 8, ku nuk mori as votat e lagjes së tij në Referendumin e datës 18 Dhjetor. Luli mashtroi LSI në bashkëpunim me Edi Ramën. Luli ka mbetur vetëm, është futur në bunker.
Fati im i madh është se kam drejtuar disa komisariate policie në veri dhe në jug, kam qenë pedagog, e themkëtë në kontekstin ligjore, nuk ka punë gjykata me vendimin e Kuvendit Kombëtar të PD-së. Në rast se Luli ka informacione që i rrezikohet jeta, nuk e lejon fare që të hyjë në seli. Ai nuk ka për tu futur atje, mbas derës së blinduar mund të ketë vënë 20 shula hekuri, por asgjë nuk mund ta ndalë uraganin popullor.
Komisioni i Rithemelimit do të futet në seli, nuk mund të bëhen shaka përpara turmës me njerëz të armatosur.
Nëse nuk hapet dera e kryetarit, ajo do të shqyhet, dhe do të mbahen shënim të gjitha sendet që janë gjetur aty. Unë po ju them një eksperiencë personale, ku zyrën e Erion Braçes unë ia kam kaluar komunës, i lashë një javë kohë, dhe ai nuk doli prej aty. Unë e shqyeva zyrën dhe mbajta procesverbal, erdhi policia dhe nuk bëri asgjë”, u shpreh Maliqi.
