Vinçens Piroli, i cili u plagos në Shkodër disa ditë më parë dhe Marjan Marku, personi që e transportoi në spital, janë arrestuar nga policia për veprat penale “Moskallëzimi i krimit” dhe “Veprime që pengojnë zbulimin e së vërtetës”.
Më datë 3 Janar, në Shkodër, persona ende të paidentifikuar dyshohen se kanë plagosur me armë zjarri 34-vjeçarin Piroli, i cili është transportuar nga vendi i ngjarjes në spitalin e Lezhës, me automjet, nga Marjan Marku.
Blutë njoftojnë se Marku, 29 vjeç, rreth orës 19:00, ka transportuar nga lagjja Bahçallëk-Shkodër, në Spitalin Rajonal Lezhë Pirollin dhe më pas është larguar, pa njoftuar Policinë.
Ndërsa Pirolli, i cili aktualisht po merr mjekim në Spitalin e Traumës në Tiranë, akuzohet se nuk ka njoftuar Policinë për ngjarjen dhe ka penguar organet e Policisë për zbardhjen e saj, duke mos deklaruar rrethanat.
“Grupi hetimor, nën drejtimin e Prokurorisë së Rrethit Gjyqësor Shkodër, po punon për identifikimin dhe kapjen e autorëve të kësaj ngjarjeje dhe zbardhjen e rrethanave të saj”, shtuan të njëjtat burime.
