Deputeti Lefter Maliqi u shpreh këtë të Mërkurë se më 8 Janar, Lulzim Basha largohet nga zyra.
Ai deklaroi se opozita ka qenë nën sqetullën e qeverisë dhe ka pasur vetëm opozitë formale. “Me sa e njoh liderin e thyer të opozitës ai nuk largohet me dëshirë pasi është peng i kryeministrit Rama”, deklaroi Maliqi. Por, shtoi se para “uraganit të 8 Janarit” do stepen të gjithë.
“Përpëlitjet e tij janë të fundit se edhe karriera politike vetvetiu mund të përfundojë në fraksion, por vota nuk merr dot sa për mandat deputeti. Ju e patë dhe lagjen ku ka lindur, kishin votuar gati 80 përqind pro shkarkimit të Zotit Basha kështu që jam i bindur që në datë 8, unë jam ndër votuesit e PD dhe të zhgënjyerit nga Zoti Basha, të prerët në besë nga ai, të mashtruar tre herë nga ai dhe i bëj thirrje gjithë demokratëve, ata 44 mijë që kanë votuar për shkarkimin e tij, por dhe simpatizantët e tjerë, të venë paqësisht, selia është e demokratëve nuk është e kryetarit të Partisë dhe aty të vendoset për procedurat e mëtejshme, për zgjedhjet në bazë dhe për zgjedhjen e kryetarit të ri të Partisë Demokratike. Nëse Basha me mashtrimet e tij, si ka mashtruar çdo anëtar të PD, ka bindjen se ka mbështetjen e 90 përqind të demokratëve… Ju e patë edhe thirrjen e zotit Paloka dje, kur të dojë të futet në garë. Do respektohet vota, por ai e di shumë mirë se ka pakicën, dhe kurrsesi pakica s’mund të sundojë dhe udhëheqë shumicën”, tha Maliqi.
“Unë jam kundër çdo provokimi por para atij uragani do stepen të gjithë. Unë nuk mendoj se demokratët do përdorin dhunë, atë ditë do jetë festë e madhe, do hapet zyra me të gjitha procedurat dhe komisioni do marrë detyrën dhe do fillojë procedurat për zgjedhjet në bazë”, shtoi.
