“Partia ‘Sfida për Shqipërinë’ mbështet hetimin pasuror të politikanëve”. Këtë e ka deklaruar sot kreu i kësaj partie Gjergj Bojaxhi në një takim me anëtarësinë.
“Jo vetëm si një forcë e re politike, por edhe si një grup qytetarësh gjithmonë e në zgjerim, të cilët kanë vendosur të angazhohen në të mirë të interesit publik, kemi ndjekur me vëmendje zhvillimet e fundit rreth hetimeve të nisura për disa prej njerëzve që ushtrojnë pushtetin legjislativ dhe atë lokal në Shqipëri. Në këtë kuadër “Sfida për Shqipërinë” mbështet hetimet e nisura së fundi ndaj deputetit të Partisë Socialiste Alfred Peza, jo si një mundësi për koka turku, por si një akt shpresëdhënës për pastrimin e politikës nga njerëzit me përfitime të paligjshme dhe për një politikë më transparente dhe realiste”, deklaroi ai.
Bojaxhiu tha se ‘ne jemi pro hetimeve për financat dhe pasurinë e politikanëve në pozitë dhe opozitë dhe zyrtarëve të të gjitha niveleve si dhe pro “VETINGUT”, për të gjithë ata që merren dhe duan të angazhohen në politikë’.
“Pas miratimit të Reformës në Drejtësi, duhet të reformojmë politikën. Një politikë e pastër nuk mund të përfshijë njerëz me precedentë penalë ose njolla të dyshimta të aktivitetit të tyre publik dhe privat. Një politikë më e pastër është një shërbim i drejtpërdrejtë për Shqipërinë. Misioni i partisë “Sfida për Shqipërinë” është një politikë e pastër drejt një Shqipërie që punon. Pushteti nuk duhet të jetë diçka që të mund të trajtohet dhe të kthehet në trampolinë për pasurim të padrejtë dhe prepotencë publike. Në rrjedhojë “Sfida për Shqipërinë” propozon një hetim të gjerë që të nisë nga Numri një i shtetit, Presidenti i Republikës, Kryetari i Kuvendit të Shqipërisë, Kryeministri e të gjithë zyrtarët me mandat politik që trumbetojnë me te madhe Vetingun si koncept, por pa veten e tyre”, tha ai.
